Ku imenso doló na nos kurason ta anunsiá fayesimentu di nos mama / fundadora,

Sra. Belmira Gonçalves do Estreito Sousa de Lira
*11 Ougùstùs 1938 – †02 Desèmber 2022

Su kasá †Francisco Gonçalves Do Estreito a bin Kòrsou na aña 1958 lagando e ì yu na Madeira. E la kuminsa traha na un kunuku komo trahador durante seis aña pa e doño di e kunuku. Despues e la hür un kunuku pa e mes traha. Despues e la manda buska su kasá na aña 1966.

Na aña 1966 Sra. Belmira a yega Kòrsou pa yuda su kasá den kunuku. Sra. Belmira a traha na Madeira for di mucha. Na Kòrsou Sra. Belmira huntu ku su kasá a traha den kunuku i despues di un aña nan a manda buska nan prome yu (Francisco Jr.) ku tabata na Madeira. Nan tres a keda traha na e kunuku. Esaki sigur tabata un tempu duru i ferfelu pa e famia. E berduranan ku nan tabata kosechá, nan tabata bai bende esakinan na plasa.
Sra. Belmira nunka no a pensa den e tempunan ei ku nan trabou duru lo bira un dia un establesimentu grandi kaminda e ku su yunan lo traha den un ambiente familiar.

Na aña 1973 nan a disidi di kumpra un toko na Janwe ku tabata yama Maria Teresa. Despues di tres aña a bende e toko i nan a bai Madeira.

Na aña 1977 nan a regresá Kòrsou i nan a kumpra un tereno ku un kasita riba dje.
A drecha e kasita i hasié un toko ku a ser yama Toko Mangusa.

Despues nan a dreché, hasié Mangusa Mini market na aña 1984.

Na aña 1989 nan a hasié Mangusa Supermarket.

Despues a kumpra un supermarket na aña 1994 ku tabata tin e nòmber di Rio Canario Supermarket.

E edifisio a ser drécha manera e ta aworaki i nan a habri Mangusa Supermarket na Rio Canario 4 di Novèmber 1996.

Mangusa Hypermarket a wordu habri 14 di Novèmber 2011 na Cas Coraweg 43.

Di parti staf, personal i famia di Mangusa,
Mama sosega na pas.🕊️